أعمى - من قصائد باب الشعراء

أعمـــــــــــــــــــى

شيماء كامل

 بتستنى اللى مش مقسوم
 وعايش للى مش حظك
بتتفائل فى وش البوم
 بتتعايش ..وده حقك!!
بتشتاق للى مش حاضن
وتترجى اللى مش حانن
 وبتعادى الظروف دايما بضحكة خوف..
بتتمنى النفس يطلع
ويرجع تانى وتكمل
تعيش فى الدنيا مشوارك
 وتختار اللى قاد نارك
 ومطمن وبتصمم على الاحلام
 وتمشى بخطوتك قدام
 وبتفَرَق سنين عمرك
وعامل فيها مش همك
وفى الاخر تلاقى انك
فى وسط الجرى ورا وهمك
دايس على قلب كان منك
وفاكر نفسك الاقوى
وبتفَتَح تلاقى انك
فى وسط التوهة والزحمة
 بتحفر قبر نسيانك
 وبتلفلف كفن حلمك
بألف وسُتميت لفة
وانك جوة حضن النور ..
وحيد أعمى